Home / Sastra / Essai / Ji’un (6)

Ji’un (6)

Engkong Godeg

Oleh: Dian Rehem

(Foto : MSN)

 

Kemaren, Ji’un ama Jali pada berenang di kali deket sawah. Lagi asyik-asyiknya berenang, tetiba si Ji’un digeroin emaknya disuruh pulang.

“Ji’un … Ji’un …”

Ji’un celingukan, ngeliat emaknya tetumbenan nyusul, dia nyaut bari tereak, “Iya Mak, ngapa Mak?”

“Buruan pulang! Ada engkong lu, noh,” suara emak kaga kalah kenceng ama suara aer sungai.

“Yaelah Mak, yarin ngapa Mak, tibang engkong dateng, kok aye disuruh pulang. Biasanya ge’ engkong numpang makan ama numpang tidur doang.” Ji’un kesel. Kaga sari-sarinya dia disuruh pulang gegara ada engkong. Apanan engkong emang udah biasa dateng ke rumahnya.

“Hush! Pulang buruan! Jangan lama-lama berenangnya.” Muka emak keliatan rada panik.

“Ngapa si, emangnya, Mak?” ngeliat emaknya begonoh, Ji’un rada kepo juga.

“Ada yang aneh ama engkong lu. Baru masuk rumah, abis salamlikum, palanya langsung goyang kaga berenti-berenti. Noh, lu liat dah!” Muka emak rada aneh. Kaya orang kuatir, tapi kaya pengen nyengir. Kaya orang nahan tawa gitu. Janggal bener dah, diliatnya.

Ji’un ngomel panjang kali lebar, bari nyelem ama kekumur.

“Et dah, aki-aki. Ngapain coba baru masuk rumah langsung gegodeg begitu? Ada kutunya kali, Mak. Palanya gatel. Makanya goyang bae jadinya. Pereksa aja ubannya, Mak. Kali-kali ada kutu nyangkut di situ”.

Si Jali nambahin, “Kena mreki kali, Mak. Mao garuk susah, palanya jadi gegodeg bae. Namanya juga udah kaga punya gigi. Hahaha.” Si Jali malah ketawa geli bari kaga nyambung ngomongnya. Dia ngakak bayangin engkongnya Ji’un palanya goyang-goyang kaya orang mabok. Abis ketawa ngikik, dia langsung nyelem bari nyengir.

Ji’un tereak lagi. “Yarinin ah, Mak, palanya mao godeg kek, mao gudig kek, apa hubungannya ama aye? Lagian emak kebangetan banget, tibang ada engkong pake ribut. Apanan engkong emang sering dateng ke rumah”.

Emak jadi sewot gegara Ji’un ngeyel. “Seh, elu nih kalu dibilangin mengkakon bae. Ono noh, engkong lu godeg gara-gara lu nyetel hape kaga dimatiin. Udah buruan pulang! Gua kaga bisa matiinnya.”

Ji’un bingung. “Ah emak, emang ngapa kalu hape belon dimatiin. Paling ge’ aye lagi nyetel lagu.”

Emak mendadak sumringah. “Nah, itu!!Gara-gara lagu yang elu setel itu, pala engkong godeg bae kaga ngasoh-ngasoh.”

Ji’un mikir. “Emangnya aye nyetel lagu apaan, Mak? Pan biasanya aye nyetel lagu Dadali doang.”

Emak langsung nyolot. “Sehh Dadali, Dadali. Dodol, kali! Orang elu nyetel lagu syantik syantik daristadi kaga berenti-berenti. Engkong lu denger Siti Badriah nyanyi ampe lupa sembahyang ama ngaji. Palanya gegodeg bae ampe kaya kena gempa 8,5 skala richter.”

“Bujug dah,” saut Ji’un ama Jali serempak.

Ji’un ama Jali takjub, entah karena engkongnya godeg gara-gara Siti Badriah, atau takjub karena emaknya nyerocos bawa-bawa skala gempa.

About Redaksi Thayyiba

Redaksi Thayyiba
Redaktur

Check Also

Kelinci

Oleh: Akhlis Suryapati     Terkisahlah seekor Kelinci imut menggemaskan, mulai kemarin ditugaskan oleh Kodok ...